୬ ଟି ଦେଶର ୧୦ ଟି ବିଦେଶୀ ନୋଟ୍ ସହ ଚୋରି ସାମଗ୍ରୀ ଉଦ୍ଧାର ୨ ଗିରଫ
ଗତ ଡିସେମ୍ବର ୨୭ ତାରିଖ ରାତିରେ ଭଞ୍ଜନଗର ସତ୍ୟସାଇ ମନ୍ଦିର ୪ର୍ଥ ଲାଇନରେ ରହୁଥିବା ଏସ୍ ରାହୁଲ ପାତ୍ର ଏବଂ ପରିବାରର ଅନ୍ୟ ସଦସ୍ୟମାନେ ଘରେ ତାଲା ପକାଇ ନିଜ ଗ୍ରାମ ଦଦରାଲୁଣ୍ଡା ଯାଇଥିଲେ। ୨୯ ତାରିଖ ଦିନ ଘରକୁ ଫେରି ଦେଖିବା ବେଳକୁ ଘରୁ ଚୋରି ହୋଇଥିବାର ଦେଖିବାକୁ ପାଇଥିଲେ। ପରେ ଏନେଇ ରାହୁଲ ଥାନାରେ ଅଭିଯୋଗ କରିଥିଲେ। ପୋଲିସ ମାମଲା ରୁଜୁ କରି ଅଭିଯୁକ୍ତଙ୍କୁ ଖୋଜୁଥିଲା। ଶନିବାର ବାଉଁଶଲୁଣ୍ଡିର ଏକ ଘରେ ଜଣେ ସନ୍ଦିଗ୍ଧ ବ୍ୟକ୍ତି ଘର ଭିତରେ ଥିବା ବେଳେ ବାହାରୁ ତାଲା ପଡ଼ିଥିବା ଦେଖି ଲୋକେ ପୁଲିସକୁ ସୂଚନା ଦେଇଥିଲେ। ଏହାପରେ ଏସ୍ଆଇ ସମୀର କୁମାର ସେଠୀ, ତଦନ୍ତ ଅଧିକାରୀ ଲକ୍ଷ୍ମୀଧର ମହାନ୍ତି, ହାବିଲଦାର ଦିଲ୍ଲୀପ ରାଉତ, ସନ୍ତୋଷ ନାୟକ, ଗଜେନ୍ଦ୍ର ସାଇଁ ପ୍ରମୁଖ ଉକ୍ତ ଘର ଉପରେ ଚଢ଼ାଉ କରିଥିଲେ। ତାଲା ଭାଙ୍ଗି ଦେଖିବା ବେଳକୁ ଘର ଭିତରେ ଅଭିଯୁକ୍ତ ଗୋପାଳ ପ୍ରଧାନ ଥିଲେ। ଏଥିସହ କିଛି ଚୋରି ଜିନିଷ ଉକ୍ତ ଘରୁ ପୋଲିସ ଠାବ କରିଥିଲା। ଏହାପରେ ଗୋପାଳଙ୍କୁ ପୁଲିସ ନେଇ ପଚରାଉଚରା କରିବା ପରେ ବଳିଆ ସମ୍ପର୍କରେ ସୂଚନା ଦେଇଥିଲେ। ପରେ ବଳିଆଙ୍କୁ ମଧ୍ୟ ପୁଲିସ ଗିରଫ କରିଥିଲା। ଏହାପରେ ଜାମପଲ୍ଲୀର ଆଶୋକ ପ୍ରଧାନ ଏବଂ ରାହୁଲ ପାତ୍ରଙ୍କ ଘରୁ ହୋଇଥିବା ଚୋରି ମାମଲାରେ ଅଭିଯୁକ୍ତ ଦ୍ବୟ ଜଡ଼ିତ ଥିବା ଜଣାପଡ଼ିଥିଲା। ପୋଲିସ ଅଭିଯୁକ୍ତଙ୍କ ଠାରୁ ସମସ୍ତ ଚୋରି ଜିନିଷ ଉଦ୍ଧାର କରିବାରେ ସକ୍ଷମ ହୋଇଛି। ବଳିଆ ଦିନ ବେଳେ ଅଞ୍ଚଳରେ ଘୂରି ବୁଲିବା ସହ କେଉଁ ଘରେ ତାଲା ପଡ଼ିଛି ତାକୁ ଦେଖି ସହଯୋଗୀ ଗୋପାଳଙ୍କୁ ସୂଚନା ଦେଇଥାଏ। ଗୋପାଳ ଖୋର୍ଦ୍ଧାରୁ ଆସିବା ପରେ ଉଭୟେ ମିଶି ଚୋରି କରୁଥିଲେ। ଏହାପରେ ଗୋପାଳଙ୍କୁ ଏକ ଘରେ ରଖି ତାଲା ବାହାରୁ ପକାଇ ବଳିଆ ଦିନ ବେଳେ ଚାଲି ଯାଉଥିଲେ। ଆବଶ୍ୟକ ପଡ଼ିଲେ ଗୋପାଳ ଏକ ଗଳା ବାଟ ଦେଇ ଉକ୍ତ ଘରୁ ବାହାରୁଥିଲେ। ଉକ୍ତ ଗଳାବାଟ ହିଁ ଅଭିଯୁକ୍ତ ଦ୍ୱୟଙ୍କୁ ଧରା ପକାଇଥିଲା ବୋଲି ପୋଲିସ କହିଛି। ଏନେଇ ଭଞ୍ଜନଗର ଥାନା କେଶ ନଂ -୪/୧ ରେ ମାମଲା ରୁଜୁ କରି ଉଭୟଙ୍କୁ କୋର୍ଟ ଚାଲାଣ କରାଯାଇଛି।
ଭଞ୍ଜନଗର ରୁ ରବୀନ୍ଦ୍ର ପ୍ରଧାନ ଙ୍କ ରିପୋର୍ଟ,୪/୧/୨୦୨୬--୮,୧୦ Sakhigopal News,4/1/2026
