ରାସ୍ତାରେ ଯାଉଥିବା ଯୁବକଙ୍କୁ ମରଣାନ୍ତକ ଆକ୍ରମଣ କରି ଲୁଟ କରି ଦୁଇ ଯୁବକ ଗିରଫ

ଜଟଣୀ : ---ଗତ  ୭ ତାରିଖ ସନ୍ଧ୍ୟା ପ୍ରାୟ ୬.୪୫ଟା ସମୟରେ ମଙ୍ଗୁ ନାୟକ ନାମକ ଜଣେ ଯୁବକ ଖୋର୍ଦ୍ଧାରୋଡ ରେଳ ଷ୍ଟେସନରୁ ଲୋକୋ କଲୋନିସ୍ଥିତ ତାଙ୍କ ଘରକୁ ଫେରୁଥିଲେ  । ମା’ ଭାଗବତୀ ମନ୍ଦିର ନିକଟରେ ଶେଖ ବାବର ଅଲ୍ଲୀ, ଶଙ୍କର ଦାସ ଏବଂ ଅନ୍ୟ ଜଣେ ସହଯୋଗୀ ସମେତ ତିନିଜଣ ବ୍ୟକ୍ତି ତାଙ୍କୁ ଅଟକାଇ ଟଙ୍କା ଦାବି କରିଥିଲେ। ପୀଡିତ ପ୍ରତିବାଦ କରିବାରୁ ଅଭିଯୁକ୍ତମାନେ ତାଙ୍କ ହାତକୁ ଗାମୁଛାରେ ବାନ୍ଧି ଦେଇ ନିଷ୍ଠୁର ଭାବରେ ଆକ୍ରମଣ କରିଥିଲେ ଏବଂ ଜୋର ଜବରଦସ୍ତି ୨୫,୦୦୦ ଟଙ୍କା ଓ ଗୋଟିଏ ମୋବାଇଲ୍ ଫୋନ୍ ଲୁଟି ନେଇଥିଲେ। ଆକ୍ରମଣ ସମୟରେ ଅଭିଯୁକ୍ତମାନେ ପୀଡିତଙ୍କୁ ଏକ ବଡ଼ ପଥର ଦ୍ୱାରା ଆଘାତ କରି ହତ୍ୟା କରିବାକୁ ଚେଷ୍ଟା କରିଥିଲେ, ଯାହା ଫଳରେ ସେ ଗୁରୁତର ଆହତ ହୋଇଥିଲେ। ଆହତ ପୀଡିତଙ୍କୁ ପ୍ରଥମେ ନିକଟସ୍ଥ ହସ୍ପିଟାଲକୁ ନିଆଯାଇଥିଲା ଏବଂ ପରେ ଉନ୍ନତ ଚିକିତ୍ସା ପାଇଁ ଭୁବନେଶ୍ୱରସ୍ଥିତ ଏମ୍ସ କୁ ରେଫର କରାଯାଇଥିଲା ।ତଦନ୍ତ ସମୟରେ ସୋମବାର ଅଭିଯୁକ୍ତମାନେ ଖୋର୍ଦ୍ଧାରୋଡ ରେଳ ଷ୍ଟେସନ ନିକଟରୁ ଖସିଯିବାକୁ ଚେଷ୍ଟା କରୁଥିବା ବିଷୟରେ ନିର୍ଭରଯୋଗ୍ୟ ସୂଚନା ପାଇ ପୋଲିସ୍ ଚଢାଉ କରି ଶେଖ ବାବର ଅଲ୍ଲୀ (୨୯)ଏବଂ ଶଙ୍କର ଦାସ(୪୦)ଙ୍କୁ ଗିରଫ କରିଥିଲା। ପଚରାଉଚରା ସମୟରେ ସେମାନେ ଅପରାଧରେ ସେମାନଙ୍କର ସମ୍ପୃକ୍ତି ସ୍ୱୀକାର କରିଥିଲେ। ଯାଞ୍ଚରୁ ଜଣାପଡ଼ିଛି ଯେ ଅଭିଯୁକ୍ତ ଶେଖ ବାବର ଅଲ୍ଲୀ ବର୍ତ୍ତମାନ ମାମଲା ବ୍ୟତୀତ ଜଟଣୀ ଥାନାରେ ଅନ୍ୟ ଏକ ଅପରାଧିକ ମାମଲାରେ ମଧ୍ୟ ସଂପୃକ୍ତ ଅଛନ୍ତି।ଅଭିଯୁକ୍ତ ଦୁହିଁଙ୍କ ବିରୋଧରେ ଅପରାଧ ସ୍ପଷ୍ଟ ହୋଇଥିବାରୁ ଆଇନଅନୁଯାୟୀ  କେଶ ନମ୍ବର ୧୨୪/୨୬ ଆଧାରରେ କୋର୍ଟକୁ ଚାଲାଣ କରାଯାଇଛି। ମାମଲାରେ ଜଡିତ ଅନ୍ୟ ଅଭିଯୁକ୍ତମାନଙ୍କୁ ଗିରଫ କରିବା ପାଇଁ ପୋଲିସର ପ୍ରୟାସ ଜାରି ରହିଛି। ଜଟଣୀ ରୁ ରଙ୍ଗନାଥ ବେହେରାଙ୍କ ରିପୋର୍ଟ,୯/୩/୨୦୨୬----୯,୪୫ Sakhigopal News,9/3/2026